Dende a plataforma denunciáronse as problemáticas que se dan desde hai anos no que respecta ao Centro de Saúde de Chantada e tamén no Hospital Comarcal de Monforte. Aseguran que a situación agrávase cada mes ou case cada semana.
Despois de dúas concentracións, unha manifestación na vila e unha carta á xerencia, que a día de hoxe non tivo resposta, a plataforma decide dar o seguinte paso e rexistrar un documento na Consellería de Sanidade onde se denuncia a desatención que vive a comarca en materia sanitaria. A este documento acompañan máis de 3700 firmas recollidas estas semanas atrás entre os veciños apoiando esta denuncia.
Con todo a plataforma fai unha convocatoria para mañá ás 12:00 na entrada principal da Consellería de Sanidade, en Santiago de Compostela, onde darán a coñecer os datos pormenorizados e problematicas cada vez maiores que se dan no Centro de Saúde, no Punto de Atención Continuada (P.A.C.) e no hospital de referencia para Chantada que é o Hospital de Monforte. Posteriormente procederán a rexistrar as demandas na oficina de rexistro da consellería.
