A VII edición dos Cantos de Taberna será o vindeiro sábado 9 de marzo, abrindo o Concello de Quiroga o prazo para participar o pasado 14 de febreiro. Os grupos tradicionais interesados xa se poden anotar gratuitamente na casa da Cultura ou chamando ao teléfono 982 435125 antes do 4 de marzo.
Dende a organización explican que a idea é contar cun mínimo de seis grupos musicais e un máximo de doce, e que cada formación conte cun mínimo de cinco integrantes. Unha das novidades que se puxo en marcha o pasado ano e que se mantén este é que se entregarán 150 € a cada grupo participante para que gaste nos establecementos aos que acuda na xornada festeira. Así mesmo os establecementos participantes comprométense a ter a disposición dos grupos tapas ou pinchos.
A organización xa se puxo en contacto cos establecementos hostaleiros da vila para participar, obtendo unha resposta afirmativa da práctica totalidade dos existentes na vila de Quiroga.
ORGANIZACIÓN DA XORNADA
O comezo ou xuntanza de grupos será ás 17:30 h. na Casa da Cultura para despois, ás 18:00 h., comezar cada un co itinerario que lles facilite a organización. O remate está programado ás 00:00 h. na Praza Rúa Lago, lugar onde se espera facer unha foliada final.
O evento desenvolverase percorrendo os locais hosteleiros participantes, seguindo os grupos as indicacións destes para a súa ubicación, e a duración da súa intervención será de 30 minutos en cada un deles. O repertorio de cada formación é libre, iso si, respectando sempre a música popular e tradicional.
