A Asociación Cultural as Cavarcas comezou a súa programación cultural do 2024 o pasado 20 de xaneiro cunha charla sobre as Comunidades Enerxéticas en relación coas Comunidades de Montes Veciñais en Man Común. Agora, entrados no mes de marzo, presenta outras dúas actividades de interese e utilidade para a veciñanza.
O vindeiro sábado, 9 de marzo, organizan unha charla coloquio sobre as vespas velutinas, o seu comportamento e o control que pode facer a poboación para combatelas, “xa que estamos no momento de informarnos e compartir coñecementos”, comentan dende a asociación. Correrá a cargo de Gonzalo Calvo Díaz, veterinario da Asociación Galega de Apicultura e será no baixo da Casa do Concello do Incio ás 19:30 h. A actividade realízase co patrocinio da área de medio rural da Deputación de Lugo.
Por outra banda, o Centro Galego de Artesanía e Deseño da Deputación de Lugo impartirá un curso de cestería de vimias en colaboración do concello que facilita os locais sociais onde se desenvolverá. Comezará o luns 18 de marzo de 17 a 20 oras e farase no baixo da Casa do Concello durante todos os luns ata completar 30 horas lectivas, de xeito que as alumnas e alumnos poidan completar o pequeno proxecto que escolla cada quen. Hai un máximo de 12 prazas e cómpre inscribirse contactando coa Secretaria da Asociación, Carme Aira, a través de teléfono ou WhatsApp no número 659061819.
