Este sábado 30 de marzo á tardiña o Concello da Pobrado Brollón e a Asociación Veciñal de Saa convidan a celebrar a súa particular “Semana SAAnta”. Para iso ofrecen música, cultura e caldo no local social desta parroquia.
A programación para este día comeza ás 20:00 h. coa presentación do libro “A música dos Valladares. Retratos de familia”, de Pablo Bernárdez e con ilustracións de Hortensia Fernández. Trátase dunha escolma de textos musicais de distintos estilos e procedencias que pertenceron á familia Valladares Núñez da Casa Grande de Vilancosta, en Berres (A Estrada). O libro recolle máis de cen anos de historia musical a través de textos alusivos á biografía da familia, asociados cada un a unha peza musical e a unha ilustración.
Despois haberá un concerto a cargo de Proxecto Valladares con temas bailables que darán paso a unha foliada. A organización ofrecerá un caldo comunitario aos presentes propoñendo que aqueles que asistan traian a súa propia cunca e culler.
A localización do local social onde terá lugar esta actividade é a seguinte: https://maps.app.goo.gl/UchkCtyHEbxZM3Nw9
Outra actividade que había programada para o domingo 31, un “safari de toponimia” que consistía nun paseo pola parroquia para recoller nomes de lugares e rexistralos na plataforma Galicia Nomeada, quedou suspendida por mor das previsións meteorolóxicas.
