O Museo Xeolóxico de Quiroga segue incrementando a súa mostra de minerais de todo o mundo, e desta volta faino grazas á colaboración do Paleontólogo Juan Carlos Gutiérrez Marco, membro do Comité Científico do Xeoparque Mundial da UNESCO Montañas do Courel.
A colección de minerais que se expón no Museo Xeolóxico de Quiroga, e que o pasado 27 de marzo visitaba o alcalde, José Luis Rivera, está composta agora por unhas 700 pezas. Os fondos do museo xa contaban cunha colección de minerais procedentes do territorio do Xeoparque Montañas do Courel, ademais dunha colección duns 200 minerais procedentes de varias coleccións particulares de colaboradores do Museo Xeolóxico.
A DOAZÓN
Coa achega desinteresada de Gutiérrez Marco, incorpóranse cerca de 500 espectaculares pezas: piritas, granates, mica, cuarzo, aragonito, xeso,… procedentes de países como a República Democrática do Congo, Madagascar, China, Guatemala, Chile, India, Estados Unidos, México, Rusia…
O Paleontólogo Juan Carlos Gutiérrez Marco apoiou e prestou asesoramento técnico para o impulso da estratexia que levaría ao recoñecemento das Montañas do Courel como Xeoparque Mundial da UNESCO.
