Segundo os populares, Monforte é o único municipio da comarca sen este servizo, provocando que moitas familias se vexan obrigadas a ir a outras localidades limítrofes para poder beneficiarse deste servizo que o Goberno autonómico pon a disposición das entidades locais, a través da Consellería de Política Social e Igualdade.

“No podemos entender como un alcalde pode renunciar este tipo de axudas que van destinadas a mellorar a calidade de vida das persoas. O Sr. Tomé nin pensa nos monfortinos, nin lle interesa facelo. Estanllo pedindo os veciños e ofrecendo a Xunta e mira para outro lado”, sinala Raquel Arias.

O Pleno do Parlamento de Galicia aprobaba este martes a proposición non de lei do Grupo Popular, que non foi apoiada polo Grupo Socialista, a través da que se solicita á Xunta que siga estendendo a Rede de unidades de atención temperá. Trátase do conxunto de intervencións dirixidas á poboación infantil de 0 a 6 anos, e tamén ás súas familias e á súa contorna, para dar resposta o antes posible ás necesidades transitorias ou permanentes que presentan os nenos e nenas con trastornos no desenvolvemento ou en risco de padecelos.

Na actualidade cóntase con 46 unidades espalladas pola comunidade galega que dan servizo a 200 concellos e atenden a máis de 4.000 nenos, “Todos os concellos que solicitaron a creación dunha unidade de atención temperá obtiveron a axuda da Xunta, que aporta a totalidade do custo das horas do servizo”. A Xunta de Galicia dedica este ano máis de 8 millóns de euros a consolidar a Rede Galega de Atención Temperá, o que supón un 60 por cento máis que en 2023.