A Oficina Móbil do Programa Acelera PEME, posto en marcha pola Deputación de Lugo, estivo ubicada na Avenida de Galicia, 55 no Concello de Pobra do Brollón ás 10:30 h. e na Praza da Compañía diante das Casitas ás 12:30 horas.
O Programa vai dirixido a autónomos ou propietarios dunha PEME que precisan impulsar a dixitalización do seu negocio. Dende esta Oficina Móbil Acelera PEME, dinamizadores dixitais proporcionaron asesoramento e axendaron citas presenciais ou telemáticas para aqueles que quixeran unha posterior consulta individualizada.
Servizos do programa Acelera Peme:
- Servizo de acompañamento dixital individual e personalizado.
- Análise do estado de dixitalización, soporte e asesoramento á empresa.
- Apoio na implantación de novas solución dixitais ao negocio.
- Consultoría en marketing dixital (redes sociais, e-mail marketing, publicidade…)
- Apoio e acompañamento na solicitude do Kit Dixital.
Trátase dunha iniciativa posta en marcha dende a Deputación de Lugo o 13 de setembro de 2023 para reforzar o asesoramento gratuíto en materia de transformación dixital que vén ofrecendo a institución provincial a empresas e autónomos da provincia a través deste proxecto, que impulsa en colaboración co Goberno do Estado.
O programa Acelera PEMES está dotado con medio millón de euros, dos cales o 80% (400.000€) proceden da Unión Europea a través da entidade pública empresarial Red.Es, dependente do Ministerio de Asuntos Económicos e Transformación Dixital, e o 20% (100.000€) da propia Deputación de Lugo.
