Os traballos de mellora levaranse a cabo no centro da calzada da rúa Dr. Casares, á altura da confluencia coas rúas Caneiro e Coruña. Suporán a mellora do saneamento coa realización da canalización de pluviais e residuais independentes, coa posterior humanización das beirarrúas correspondentes. Instalarase un pozo unitario de residuais que une as dúas marxes da rúa Doutor Casares e na rúa Concepción Arenal instalarase un separador líquido dinámico para mellorar o verquido de augas pluviais ó río.

As medidas de ordenación do tráfico adoptadas para levar a cabo estas actuacións, serán as seguintes:

• Cortarase o tránsito de vehículos no tramo de rúa Dr. Casares comprendido entre o cruce con rúa San Pedro e o final da mesma, á altura do enlace con rúa Concepción Arenal.
• Cortarase o tránsito de vehículos no tramo da rúa Morín comprendido entre o cruce con rúa Dr. López Suárez e o inicio da mesma, á altura do enlace con rúa Concepción Arenal.
• Cortarase o tránsito de vehículos pola rúa Caneiro na súa totalidade.
• Cortarase o tránsito de vehículos pola rúa Pontevedra na súa totalidade.

A circulación alternativa farase pola rúa San Pedro, para aqueles vehículos que procedan da Ronda María Emilia Casas Baamonde e do tramo non pechado ó tráfico da rúa Dr. Casares, seguindo polas rúas Leopoldo Calvo Sotelo e Rosalía de Castro ata Dr. López Suárez e Condesa Pardo Bazán, desde as que enlazarán con rúa Morín.

Nas rúas cortadas permitirase o paso de vehículos de residentes, usuarios de garaxes, de vehículos de servizos e de carga e descarga para os establecementos comerciais existentes na zona, así como se facilitará o acceso a estación de servizo ubicada nas inmediacións da zona dos traballos. Todo elo, sempre de forma que resulte compatible coa situación das obras en cada momento.

Estas actuacións corresponden á 2ª Fase das obras de mellora na rede de saneamento urbano de Monforte e contan cun investimento de 1,8 millóns de euros, “un investimento millonario para a cidade que fala por si soa, da importancia do proxecto das obras que se están a realizar e que van supor unha mellora moi significativa do saneamento na cidade”, destaca o Alcalde. As actuacións están cofinanciadas pola Confederación Hidrográfica do Miño-Sil que aporta o 80% da inversión, e polo Concello de Monforte, con unha porcentaxe do 20%.

Todas estas actuacións buscan a redución de augas brancas que se incorporan á rede de forma irregular por deficiencias construtivas e do estado de conservación dos pozos e levar a cabo reparacións estruturais da rede nas rúas mencionadas que precisan dunha intervención mais urxente.

O rexedor monfortino remarca que nestes catro últimos anos, a inversión total na rede de subministro de auga alcanza os 4 millóns de euros, o que demostra que se está a facer un gran esforzo por corrixir os problemas de saneamento da cidade que se veñen sufrindo dende fai moitos anos. En marzo de 2023, o Concello asinou coa CHMS unha inversión de preto de 5 millóns de euros para a construción dunha nova depuradora no Polígono industrial do Reboredo.

O Concello ten en marcha outro proxecto fundamental para mellorar o saneamento da cidade, como é a instalación da nova tubería xeral de fundición na rede de abastecemento de auga, entre os depósitos do Cornado e os depósitos de San Vicente, que ten un investimento de 1,7 millóns de euros, e que foi froito das negociacións do Alcalde coa empresa FCC Aqualia S.A.