A reunión concluíu co rexeitamento destas operacións, “que supoñen entregar o territorio a intereses empresariais”. Destaca a Asociación Veciñal que nos últimos anos dase unha alarmante proliferación de parques eólicos no conxunto da comunidade e “no territorio no que nacemos e habitamos”.

A Asociación advirte nun comunicado das consecuencias que traerán estas instalacións:

• Afondarase non abandono rural: A presenza dos muíños, o ruído, as torretas de derivación e o seu cableado, os desmontes e accesos farán difícil e incómoda a vida en varios quilómetros ó redor, o que nun curto prazo provocará un éxodo dos habitantes. Agora que se está a observar un moderado e optimista repunte poboacional e unha crecente restauración de vivendas e aldeas, a perda de atractivo das zonas afectadas polos eólicos freará a demanda de vivienda.
• Incidencia negativa na economía: A Ribeira Sacra está espertando un grande interese turístico, e a proba é o crecente número de proxectos empresariais relacionados con esta actividade. Non obstante, co maltrato da paisaxe que supón a presenza dos parques eólicos, a hostalaría, as casas e os pazos de turismo rural e as iniciativas de lecer verán mermada a súa actividade. A construción das instalacions e das vias de aceso limitará e fragmentará as plantacións e a utilidade dos numerosos montes comúns que atravesa.
• Destrozo da paisaxe: Todos os elementos construtivos destes parques, así como os desmontes de aceso e derivación supoñen unha agresión contra a paisaxe e a natureza, o elemento patrimonial máis valioso que temos e que nos levou á candidatura a Patrimonio da Humanidade.
• Incidencia no medio: A presenza destes parques ten demostrado o grave prexuízo sobre a biodiversidade da fauna. Aves e mamíferos verán suprimidos os seus nichos ecolóxicos e as vías de tránsito.
• A quen beneficiarán?: A compra ou a expropiación forzosa aos propietarios dos terreos supón escasos beneficios fronte á economía crecente que desenvolven outros sectores produtivos. Os únicos beneficiarios serán as empresas enerxéticas, que se aproveitarán do territorio.

“Entendemos que a enerxía eólica é limpa pero non pode ser imposta desta maneira. Para ser sostible a primeira premisa é non molestar nin causarlle prexuizos a quen naceu e habita no territorio. Non podemos permitir que se repita o que aconteceu nun pasado recente coa construción dos encoros e presas, que provocaron a migración da poboación, para beneficio únicamente da empresa”, sinalan desde a Asociación Veciñal. Conclúen asegurando que os parques eólicos comprometerán o futuro da comarca, ao seren incompatibles co obxectivo de que se recoñeza a Ribeira Sacra como Patrimonio da Humanidade.