O PP de Monforte defenderá no pleno deste mes unha modificación da ordenanza fiscal do imposto sobre vehículos de tracción mecánica para dar unha bonificación do 100% aos vehículos cunha antigüidade mínima de 25 anos.
A voceira popular, Katy Varela, explica que se realiza esta petición para evitar o goteo de perda de veciños empadroados en Monforte xa que moitos concellos da contorna xa contan con esta bonificación “sen necesidade de que o seu vehículo teña a cualificación de histórico e sen necesidade de estar inscrito no Rexistro da Xefatura Provincial de Trafico, polo que os seus propietarios se censan a eles mesmos e os vehículos neses concellos”.
No último censo Monforte apenas contivo a poboación por enriba dos 18.000 habitantes despois de máis dunha década de caída constante. Segundo os populares, os monfortino empadróanse en localidades da contorna por este tipo de incentivos.
Por este motivo, os concelleiros populares ven necesaria unha modificación da ordenanza fiscal reguladora do imposto sobre vehículos de tracción mecánica, concretamente o artigo cinco relativo ás bonificacións, contemplando a bonificación do 100% para todos os vehículos de mínimo de 25 anos de antigüidade, independentemente de que estean inscritos como antigos no Rexistro da Xefatura Provincial de Trafico.
