Unha alerta amarela da AEMET provocou a cancelación, o pasado 8 de xuño, do esperado “Día do Comercio de Chantada”. Ante tal situación, e para seguir adiante coa iniciativa, decidiuse trasladar o evento a este sábado, 22 de xuño, desde as 10 da mañá ás 23 horas.
Máis de 40 negocios asociados ao Centro Comercial Aberto Ribeira Sacra e máis de 20 artesáns e comerciantes doutras zonas de Galicia daranse cita en Chantada para celebrar un día moi especial, que encherá de actividade as rúas da vila.
Os establecementos participantes estarán abertos mañá e tarde, para facilitar as compras, e na Rúa Fontearcada haberá unha mostra de coches antigos e postos de asociacións, como AFA Chantada, para vender merchandising e informar sobre as súas actividades.
Ademais, haberá zona infantil con inchables e postos de lambetadas, e na Rúa do Comercio instalarase un mercadiño de artesanía. Na Praza de España estará a zona de alimentación.
Para que este día de festa do comercio sexa especial, e facilitando o trafego de persoas, converteranse en peonís as rúas Xoán XXIII e Fontearcada, rúas que quedarán cortadas ao tráfico rodado.
Aproveitando a celebración deste “Día do Comercio”, falamos con Iñaki Castiñeira, presidente da Asociación de Empresarios e Centro Comercial Aberto Ribeira Sacra .
Preséntase unha xornada festiva moi ambiciosa. Como xurdiu a idea de organizar unha xornada coma esta cun programa tan completo?
A idea xurdiu para continuar coa campaña da Noite Aberta promovida durante anos polas directivas anteriores. Quixemos ampliar o impacto na vila desa campaña, polo que decidimos facer actividades durante todo o día. Tamén apostamos por cambiar o día da campaña, pasando de facela un venres a realizala un sábado, para que a afluencia de público fose maior.
Implicación a tope do sector empresarial e comercial, non si?
Estamos moi ledos da implicación do comercio da vila, así como de outras empresas que se apuntaron ao Día do Comercio de Chantada. Queremos dar a coñecer tanto ao comercio como ao resto do sector empresarial da vila. Por iso contaremos con empresas de distintos sectores que amosarán os seus productos, ademais de contar coa colaboración doutras asociacións da vila que tamén estarán presentes este sábado, día 22.
“Estamos moi ledos da implicación do comercio da vila, así como de outras empresas que se apuntaron ao Día do Comercio de Chantada”
E incluides na inciativa a empresas doutros concellos. Cóntanos.
Decidimos contar con empresas e artesáns doutros lugares para ter maior oferta no evento. Os artesáns veñen sempre ao evento da Feira de Artesanía que celebramos xunto coa Feira do Viño, ademais.
Por que credes que fan falta este tipo de eventos ‘máis potentes’?
Consideramos que este tipo de eventos supoñen un pulo para a vila. Agardamos que o Día do Comercio sexa moi positivo para o comercio, pero tamén para as empresas de restauración.
“Consideramos que este tipo de eventos supoñen un pulo para a vila”
Cadaquén conta a feira como lle vai nela, pero como está, obxectivamente, o comercio chantadino actualmente?
É certo que a dixitalización está afectando moito ao pequeno comercio. No caso de Chantada contamos con comerciantes que, nalgúns casos, están nos seus últimos anos en activo, e estar ao día en temas de dixitalización non é doado. Pero, ao tempo, as novas xeracións de empresarios da vila optan pola dixitalización e a forte presenza en redes sociais, venda en tendas virtuais como complemento á presencial… Imos no bo camiño!
Para rematar, unhas palabras para animar aos lectores a dar unha volta polo ‘Día do Comercio’ este sábado.
Gustaríanos convidar a todo o mundo a que veña a Chantada este 22 de xuño. Haberá descontos nos comercios, música, actividades para os cativos e unha ampla oferta para gozar da gastronomía da vila e dos seus viños… que máis se pode pedir para un sábado?
HORARIOS E LOCALIZACIONS DAS ACTIVIDADES
De 11 a 12:00 horas, pasarrúas con grupo de gaitas e baile tradicional polas rúas de Chantada.
De 12:30 a 13:45 horas, na rúa rúa Xoán XXIII, concerto de grupo de gaitas e baile tradicional.
De 16 a 17:00 horas: pasarrúas con batukada.
De 17 a 20:00 horas, zona infantil con inchables e postos de lambetadas.
De 17 a 20:00 horas, cuarteto de gaitas polas rúas.
De 20:15 a 21 horas, na Rúa do Comercio, concerto de grupo de acordeóns.
De 18:45 a 20 horas, concerto de grupo de música moderna na Praza de Galicia.
De 21 a 22 horas, en O Cantón, actuación de Tirapralá.
As actuacións musicais están organizadas pola Casa da Música de Chantada.
