O Concello de Bóveda vén de dar acoñecer a obra gañadora do X Concurso de Carteis da XX Feira Tradicional de Rubián ‘Outrora’.

A viguesa Nina Rodríguez Rodríguez, que recibirá un premio de 400 euros, foi a creadora da obra gráfica que será imaxe desta senlleira celebración que terá lugar o 14 de xullo. O cartel, coa información do evento no centro, amosa ilustracións con estampas de traballos rurais e elementos típicos das feiras tradicionais.

Ao concurso presentáronse un total de 18 orixinais chegados de diferentes puntos; da Comarca de Lemos, do resto de Galicia e tamén de fóra, de lugares como Madrid, Alicante, Zaragoza, Albacete ou Vitoria.