Dúas persoas resultaron feridas este domingo tras sufrir unha saída de vía co vehículo no que circulaban pola estrada LU-633, ao seu paso polo municipio lucense de Samos. Segundo informou o 112 Galicia, os feitos ocorreron ao fío das 04.00 horas. Foi un particular quen deu aviso á central de emerxencias para advertir deste sinistro no quilómetro 44 desta vía, en concreto, na parroquia de Frollais. Na súa comunicación, indicaba que as persoas estaban feridas e que non podían saír do interior do vehículo.
Así, os operadores do Centro Integrado de Atención ás Emerxencias de Galicia (CIAE-112) mobilizaron ata o punto ao Servizo de Urxencias Sanitarias de Galicia-061, aos Bombeiros de Sarria, á Garda Civil de Tráfico e ao persoal de mantemento da vía. Xa no punto, os bombeiros tiveron que facer uso de material de excarceración para liberar aos dous feridos e que puidesen ser atendidos polos profesionais sanitarios.
