Preto dunhas 50 persoas participaron o pasado 29 de xuño da primeira edición deste encontro organizado polo colectivo Náufragos do Paradiso. O evento, que tivo lugar no Restaurante Bocalino de Monforte, consistiu nunha gustosa cea, na presentación dunha curta documental e nun concerto de Rock & Roll.
Ademais dunha boa representación de socios e persoas vinculadas ás actividades da asociación dende o ano 2011, o acto contou coa actuación da banda de rock monfortina Doc Magoo´s e dos responsables da produtora Némesis Audiovisual, autores estes últimos da curtametraxe documental 10 anos de Paradiso.
UNHA NOVA ETAPA CON ENCONTROS E NOVOS CAMIÑOS
Logo de que o pasado verán se despedise definitivamente o Festival do Paradiso, o núcleo responsable da organización quixo aproveitar o tempo que adoitaba ocuparlle á produción do festival por estas datas para celebrar unha festa-encontro. A mesma quixo servir de recoñecemento a socios e colaboradores por estes anos compartindo camiño.
Un dos recoñecementos tiña que ver co traballo audiovisual realizado por Némesis Audiovisual para inmortalizar o último festival (2023). A curtametraxe proxectada céntrase no testimonio directo dalgúns participantes vinculados á organización plasmando en imaxes o desenvolvemento desa última edición.
Este encontro, en palabras de Maro Carretero, “tamén serviu para saldar unha débeda cos nosos queridos e admirados Doc Magoo´s xa que nunca tiveran a oportunidade de actuar durante o festival por problemas de axenda”; e serviu así mesmo para intercambiar pareceres sobre o panorama cultural no Val de Lemos e as súas necesidades. “Actualmente, os Náufragos estamos inmersos nunha etapa de valoración e posta en marcha de novas actividades culturais e algunha que outra colaboración con organizacións da zona”, comentaban tamén dende o colectivo.
Respecto da curtametraxe documental, en vindeiros días estará dispoñible a través das súas redes sociais.
