Os camiños rurais, explican desde o PP; son esenciais para vertebrar e conectar núcleos de poboación pequenos e facilitar os desprazamentos dos seus veciños, así como facilitar o paso de maquinaria no entorno rural favorecendo unha maior axilidade das operacións agrarias e dos desprazamentos entre parcelas.
O concelleiro popular, Emilio Iván Vázquez, considera fundamental garantir o correcto estado destas infraestruturas por ser as únicas vías de comunicación para os veciños destes núcleos, “Pero no Concello de Monforte o estado de conservación destes camiños rurais é moi mellorable. A base principal para ter unhas vías en boas condicións durante máis tempo é realizar o correcto mantemento destes camiños, cunhas gabias limpas e con capacidade suficiente para manter drenada a capa de rodadura do camiño”, explicou.
“Somos conscientes que as características climáticas da nosa comarca unido a falla de actuacións de conservación nos viais das parroquias orixinan que as gabias dos nosos camiños se atopen taponadas de terra e mesmo en algúns punto sexan inexistentes e que sexa necesario realizar desbroces máis continuados e intensificar as actuacións de conservación da nosa rede viaria”, algo para o que, no caso de ser necesario, “hai que aumentar o orzamento destinado a este fin”.
Neste senso, a voceira popular, Katy Varela, sinala que analizando os orzamentos do concello de Monforte para este ano, constátase que o programa 454 de camiños veciñais dispón de 72.000€ de crédito dun total de 16.380.335,94 de orzamento total do Concello. “O Concello de Monforte soamente dedica á conservación de camiños rurais o 0,5%”, explicou.
