O delegado territorial da Xunta en Lugo, Javier Arias, e a xerente da Fundación Artesanía de Galicia, Elena Fabeiro, participaban o mércores 7 de agosto na primeira das xornadas da iniciativa Artesanía de Galicia no Courel, impulsada pola Xunta por cuarto ano consecutivo en Folgoso do Courel. O obxectivo desta acción é achegar ao público as técnicas artesanais e os valores que implica o feito á man, ademais de impulsar e consolidar a marca Artesanía de Galicia.
Artesanía de Galicia no Courel é un evento centrado exclusivamente na divulgación dos oficios artesanais e conta coa colaboración do Concello de Folgoso do Courel e da Fundación Uxío Novoneyra. Durante a súa visita, estiveron acompañados pola alcaldesa, Lola Castro.
ORADOIROS E FORMACIÓNS
Ata o domingo 11 de agosto os visitantes que se acheguen a esta localidade poderán participar nos 9 obradoiros gratuítos e abertos para todos os públicos que están programados. No Centro Sociocultural Fondo de Vila celebraranse en horario de 10:30 a 13:30 e de 16:00 a 18:00 horas as actividades de olería, tecido tradicional e estampaxe. Durante os cinco días do evento celebrarase un obradoiro para amosar a Técnica de Felpado ou gorullo, impartido por Lourdes Otero, de Fusaiola; e o ceramista Carlos San Claudio será o encargado de impartir o obradoiro de “Iniciación ao torno cerámico”.
Sandra Betanzos, de Amor ó Teu, impartirá un obradoiro diferente cada un dos días. O mércores 7 foi o de Estampaxe de postais con selos; este xoves é o de Estampaxe de xeométricos en avionetas de goma eva; o venres 9, o de Estampaxe de patrón de repetición con goma eva en rodete; o sábado 10 amosará Estampaxe de papel e téxtil e manualidade de medusa; e o domingo 11, será a quenda da Estampaxe de cadernos con selos.
Na Fundación Uxío Novoneyra terán lugar dous obradoiros impartidos por María José Martínez e José Antonio Carrera, de Peixesapop, en horario de 11:00 a 13:30h e de 16:00 a 18:00h. Do 7 ao 9 de agosto terá lugar o obradoiro de Iniciación ao traballo con coiro e os días 10 e 11 de agosto impartirán un obradoiro de Decoración de louza. Todos estes obradoiros teñen carácter gratuíto e non requiren inscrición previa.
A programación de Artesanía de Galicia no Courel inclúe tamén sete cursos de iniciación a diferentes oficios como a ourivería, a cestería, o téxtil ou a carpintería, para os que se requiría inscrición previa. Na Antiga Escola Unitaria de Parada desenvolveranse o curso de Iniciación á ourivería, impartido pola ourive Susi Gesto, que durará os cinco días do evento. Na Carbiña terán lugar dous cursos de cestería, impartidos por de Julia de la Cal, de La Parabólica – Paxes revisitados, do 7 ao 9 de agosto, e Cesta Niño, os días 10 e 11 de agosto – e dous cursos de tecido ás agullas a cargo de Lola García, de Logaro: un sobre a Técnica do Nalbinding, do 7 ao 9 de agosto, e outro de iniciación da forquita con gancho, os días 10 e 11.
Por último, na Fundación Uxío Novoneyra, o artesán Rodrigo Mosquera, de Tresoficios, dirixirá un curso de Técnicas de Carpintería con alternativa para dous grupos diferentes: un do 7 ao 9 de agosto e outro que se concentrará na fin de semana, o sábado 10 e o domingo 11.
Para consultar prazas dispoñibles nos obradoiros consultar a seguinte páxina web: https://artesaniadegalicia.xunta.gal/gl/formacions
