Na exposición de motivos Courel Vivo destacaba o valor natural deste territorio que fai que o turismo e os postos de traballo relacionados co turismo sexan fundamentais no deseño do Courel do futuro. “Eses valores tamén se estenden ó mundo da astronomía e a calidade dos nosos ceos. Contando cun dos ceos menos contaminados luminosamente, con mellor seeing e transparencias dos mesmos”, destacan.
No ano 2017 CV presentaba unha proposta similar, daquela Galicia tiña esta distinción para 2 zonas. Hoxe xa son 7 as Certificacións que deu a Unesco en Galicia. A maiores a Fundación Starlight permite certificar aloxamentos. Onde Casas de Turismo Rural, Vivendas Turísticas, Acampamentos, etc poderían obter ser Aloxamento Starlight, tendo material para contemplar o cosmos. Material que se debería subvencionar. Gozarían de moito máis visibilidade a nivel internacional e a fundación enlazaríaas na súa páxina web.
“Todo isto, non deixa lugar a dúbidas dos beneficios que suporá a medio prazo para o noso Concello. Sen embargo o PP deixa pasar a oportunidade de poñer ao Courel no mapa e vota en contra dos inteses dos veciños cando cun máximo de 1000€ para os trámites poderiamos ter un referente para esta certificación”, lamentan desde Courel Vivo.
Consideran que para optar á certificacións poderíase contar con fondos do Grupo de Desenvolvemento Rural (GDR) ou calquera outro ente podería subvencionalo e poder así dinamizar a zona cun proxecto positivo.
