A Xunta Directiva da Federación de Asociacións está moi satisfeita co resultado deste primeiro encontro e considera que debe seguir afondando na participación social e o debate sobre os problemas reais da zona, “fronte o modelo da Xunta, que consiste en impor un proceso xa predefinido de candidatura a Patrimonio Mundial que obvia o contexto sociodemográfico deste territorio”.
Os sindicatos agrarios SLG e UUAA, repasaron para os presentes a grave crise desta vendima, “que ten raiceiras estruturais, sen que a Xunta poña riba da mesa medidas axeitadas”. A este respecto, a FEARS apoia a mobilización convocada o venres, 6 de setembro, en Monforte ante o Consello Regulador da DORS.
Tamén asistiron representantes da FAPACEL (ANPAS da provincia de Lugo), con quen houbo coincidencia na necesidade dun plan educativo para o ensino rural e a necesidade de profesorado estable e persoal de apoio suficiente para que as crianzas das comarcas da Ribeira Sacra non perdan dereitos educativos. Dende a FEARS apoian as mobilizacións das ANPAS contra os recortes educativos e a concentración que terá lugar en Sober o venres, 6 de setembro.
I Encontro de Asociacións da Ribeira Sacra / FEARS
Ao encontro asistiron tamén persoas directivas da Federación Miño (asociacións de Ourense), da Federación de Asociacións de Valladolid e da Federación Estatal de Asociacións, que incidiron na importancia da participación veciñal á hora de conseguir servizos e dereitos para as persoas dos barrios e parroquias máis abandonados polas administracións, como é o caso da Ribeira Sacra.
Outros asuntos a debate foron a ameaza de macroeólicos en territorios de importancia ecolóxica, o problema da contaminación das augas, a importancia de aumentar a participación da mocidade no asociacionismo, a necesidade de traballo asociativo específico con enfoque de xénero ou as carencias da atención sanitaria na zona.
A cultura ribeirá como valor, fronte o branqueamento dos encoros
A Federación de Asociacións da Ribeira Sacra aproveitou a visita guiada ao Ecomuseo de Arxeriz para “reivindicar a memoria da cultura ribeirá asolagada polos encoros do franquismo, en contraste co enfoque da candidatura a Patrimonio Mundial, que os ve coma un valor”.
Precisamente, o Ecomuseo de Arxeriz demostra a importancia da investigación e recuperación da riqueza etnográfica da zona. “Semella que o discurso da Xunta sobre o valor da candidatura muda segundo conveña á marca Ribeira Sacra, entendendo o territorio como un obxecto de consumo turístico e non como un espazo onde a cidadanía sexa a protagonista”, conclúen desde FEARS.
I Encontro de Asociacións da Ribeira Sacra / FEARS
