O Concello de Quiroga, a través das Concellarías de Servizos Sociais e Normalización Lingüística, programa unha viaxe a Santiago de Compostela, o sábado 19 de outubro, para asistir a unha función do Centro Dramático Galego.
A obra que se representará, “Terceiro Acto”, é un dos espectáculos da programación do 40º aniversario do Centro Dramático Galego que complementa esta oferta teatral cun “Programa de Mobilidade”; cumprindo co obxectivo de achegar as súas producións ao público de toda Galicia ofrecendo o desprazamento de balde.
O Concello de Quiroga, dispón de 15 prazas. O autobús sairá da Casa da Cultura sobre as 10:00H e a función terá lugar no Salón Teatro de Santiago de Compostela ás 18:00 h. Durante o tempo libre ata a hora da función os participantes farán unha visita ao casco vello da cidade e comerán pola zona. A comida pode ser en grupo ou ben cada un pola súa conta.
