Os Rechouchíos e Os Afogapalletas, dous grupos de música tradicional locais, organizan os IV Cantos de Taberna en colaboración coa Área de Cultura do Concello de Taboada. O evento será o 26 de outubro, comezará coa xuntanza dos grupos ás 18:00 h. e a partir das 19:00 h. farase o percorrido festeiro que finalmente a organización diseñará unha vez visto o número de grupos. Os participantes terán cea de balde e ao remate haberá unha Foliada.
O cartel da cita, elaborado por Alberto López Furelos membro da Asociación Rechouchíos presentouse coa presenza das dúas agrupacións organizadoras e o Concelleiro de Cultura, Manuel Diéguez Vázquez. A presentación tivo lugar na praza do Cuartel Vello, detrás da Casa da Cultura, onde os grupos imparten as súas aulas e ensaian para que a música tradicional galega chegue a toda a veciñanza e aos cativos da vila.
Lucía López de Rechouchíos confiaba no éxito da celebración, “agardamos que se repita o bo ambiente entre os grupos e a boa acollida dos veciños na edición anterior”. Manuel Diéguez felicita á organización polo traballo levado a cabo e amosa a súa satisfacción co tecido cultural do municipio “xa que é un pracer contar con xente tan comprometida co seu Concello e coa transmisión da cultura musical do país”.
