Desde a ANPA do CPI Poeta Uxío Novoneyra trasladan a súa preocupación polas circunstancias extremas que vive no día de hoxe. As intensas chuvias que afectan concello están incrementando a perigosidade do desvío habilitado entre Seoane e o colexio, o cal xa presentaba graves problemas de seguridade en días normais.
As familias da parte norte do Courel, as que dependen deste desvío para levar aos seus fillos e fillas ao colexio, tomaron a decisión de non arriscarse e deixar aos menores na casa para evitar o percorrido. A situación meteorolóxica deste mércores deixou o desvío (que ten firme de formigón, seixos rodados e pendentes que chegan ao 30%) especialmente esvaradío e perigoso. “É totalmente inaceptable que sexamos as familias as que teñamos que optar por estas medidas de precaución ante a falta de actuación das autoridades competentes”, aseguran.
En solidariedade co resto, tamén as familias que non dependen do desvío optaron por deixar aos nenos na casa. “Consideramos que a situación de hoxe constitúe, na práctica, unha folga “de facto” debido á perigosidade do desvío, á inseguridade que supón transitalo baixo estas condicións meteorolóxicas e á indiferenza da administración para tomar medidas ao respecto”, sinalan.
Lembran que as Consellerías de Educación e Mobilidade son plenamente conscientes dos perigos que presenta este desvío. Este mércores os pais e nais do CPI Poeta Uxío Novoneyra recibiron unha comunicación oficial do centro educativo anunciando a suspensión das clases, pero a maioría das familias xa tiñan decidido non expoñer aos menores a esta situación de risco.
Dende a ANPA do CPI Poeta Uxío Novoneyra, solicitan ás Consellerías de Educación e Mobilidade que lles dean unha solución urxente a este problema, “máis tendo en conta que a promesa de abrir o tráfico de novo na LU-651 a partir do venres, 11 de outubro, non se vai cumplir, tal como xa supoñíamos cando empezou o corte hai máis de dous meses”. Lembran tamén que a Consellería de Mobilidade aínda non tivo a cortesía de responder á petición dun vehículo con tracción ás catro rodas para que faga de lanzadeira entre Seoane e o Colexio.
“A administración ten a obriga de adoptar inmediatamente as medidas necesarias para asegurar que todas as alumnas e alumnos poidan asistir ao colexio en condicións de seguridade, independentemente do tempo que faga. A Xunta e as Consellerías implicadas non poden esquecer que somos un concello de montaña, cunhas características especiais, que fan máis relevantes as situacións extremas. Os nosos pequenos teñen dereito á educación, en igualdade de condicións, e as administracións deben velar por eses dereitos, se queremos un futuro para concellos de montaña coma o noso. Por unha educación segura para as nosas fillas e fillos”, conclúen.
