Á Conselleira de Medio Rural, María José Gómez e a AGACAL, reitéranlles a solicitude de convocatoria por parte da Consellería dunha mesa de traballo na que estean presentes todos os actores da Denominación de Orixe, “ou polo menos que fagan pública a folla de ruta para a Denominación de Orixe Ribeira Sacra”. Apuntan que, “Explicámoslle tamén á Conselleira Gómez que rematada a vendima na D.O. Ribeira Sacra, os datos publicados polo Consello Regulador constatan unha diminución de vendima nas uvas tintas de 1.780.408 quilogramos, case un 27% con respecto ao 2023.”
Aos alcaldes dos 19 concellos da D.O. Ribeira Sacra pídenlles “que insistan na necesidade de establecer medidas reais, claras e que se coñezan xa. Os anuncios que se quedan só niso, en simples anuncios, o único que provocan é un maior desánimo das persoas afectadas”.
Lembran desde SLG-CCLLLA que “a vendima do ano que ven empézase a finais deste ano polo que, se a Xunta de Galicia segue sen tomar ningunha medida, van quedar cepas sen podar”. E pídenlle á Consellería máis implicación co sector, “É moi rechamante que na Rioja a súa homóloga solucionase o problema de excedentes adoptando un marco legal para aprobar axudas de minimis, é dicir, que hai unha posibilidade clara e eficaz para apoiar ás persoas produtoras dende a Administración pública”.
