A ‘Xornada Castañeira’, un encontro para socializar poñendo en valor a celebración comunitaria do Magosto no que non faltarán as castañas asadas, con empanada, viño e sobremesas. “Tamén pretende ofrecer a interacción da rapazada coa elaboración de cabazas de Samaín, e as visitas a caniceiras que aínda se conservan na aldea dos Anguieiros. Eses lugares onde antigamente se secaban as castañas ao calor das cociñas baixas ou lareiras”, apuntan desde a asociación organizadora, Boca do Monte.
Comezarase ás 17:00h co obradoiro de Cabazas de Samaín e visitas ás caniceiras. As 20:00h empezarase a facer lume para asar as castañas e a partir das 21:00 h. merenda-cea e castañas asadas con sobremesas, viño e licores. A continuación foliada co grupo tradicional O Recanto.
E este ano incorporan unha interesante camiñada divulgativa na contorna do Túnel de Montefurado. Será o domingo 3 con saída ás 10:00 h. dende a aldea dos Anguieiros e volta ao mesmo lugar sobre as 13:00 h. despois do roteiro pola antiga canle deste monumento natural único que lembra o pasado aurífero da zona. O guía será o xeólogo Óscar Pazos, autor do libro “A invención da Gallaecia e a minaría do ouro” (Aterra Libros 2023).
Colaboran coa Asoc. Boca do Monte, o Concello de Quiroga e a Área de Cultura da Vicepresidencia da Deputación de Lugo.
