A Xunta de Goberno deste venres aprobou un convenio co concello de Taboada de 105.000€ para realizar diferentes actuacións. Por unha banda para comezar a reforma que converterá a antiga Casa Escola da Parroquia de Meixonfrío nun local social destínanse 30.170€.
O deputado de Promoción Económica e Social, Pablo Rivera Capón destacou que “con esta obra, na que se acondicionará de xeito integral toda a estrutura, damos resposta a unha demanda dos veciños e veciñas desta parroquia, que poderán desfrutar dun espazo de encontro onde realizar diferentes actividades”.
Os 75.000€ restantes serán para acondicionar o Camiño das Neves, na parroquia de Meixonfrío, que dá acceso ás vivendas situadas no núcleo de Cadeiroás, Zoas e ao vial que une os núcleos de Friamonde e Couso, en Mourulle.
Realizaranse tamén melloras no camiño da Bouza a Maxal que dá acceso ás vivendas do núcleo de Faquios e A Casilla. Nos dous casos mellorarase o pavimento e procederase á limpeza de cunetas co fin de facilitar a circulación das augas.
