O outono é época de recolección de diferentes produtos da horta, sendo as cabazas un deles. Cabazas que ultimamente se veñen empregando para a decoración e ambientación no Samaín pero que seguen tendo a súa importancia na economía doméstica en moitos fogares das nosas aldeas.
En Quiroga son aínda moitos os veciños que as sementan pois son moi empregadas para facer purés, para a alimentación dos porcos e para facer certo tipo de embutidos nas matanzas: os chourizos cabaceiros. Aínda que o tamaño dos froitos é moi dispar, no caso desta vila, e segundo refire nas súas redes sociais a Radio Televisión Municipal de Quiroga, hai un veciño que ano tras ano consegue ter magníficos exemplares.
“Jovito Campo González ten a súa horta no casco urbán de Quiroga e esta non é a primeira vez que nos achegamos a ver os seus magníficos exemplares. Este ano conseguiu algún que rolda fácilmente os noventa quilos. O secreto, segundo matizou, está na lúa, no abonado e na rega”, comentan dende este medio de comunicación local.
E engaden “orgulloso da súa colleita, Jovito contounos que estas fermosas cabazas servirán de alimento para os marraus do seu fillo”.
Ademais destes espectaculares exemplares de cabazas, seica este labrego xubilado ten conseguido tamén plantas xigantes de coias.
