O Presidente da Deputación de Lugo, José Tomé Roca, acompañado polo Alcalde de Quiroga, José Rivera Castro, e o Tenente de alcalde, Vicente Vizcaíno Parra, supervisou esta semana a entrega dun tractor ao municipio quirogués, destinado ao mantemento e acondicionamento de camiños rurais.

José Tomé Roca subliñou durante a recepción deste vehículo que será unha ferramenta clave para mellorar a mobilidade e as comunicacións nas zonas rurais do municipio. “Quiroga contará cun vehículo fundamental para acometer os arranxos das vías rurais, o que contribuirá a mellorar a calidade de vida dos veciños e a impulsar o desenvolvemento do municipio”, afirmou.

A institución provincial destinou 120.000€ ao Concello para a adquisición deste tractor, “un investimento que servirá para reforzar os recursos dos pequenos municipios, como o de Quiroga, facilitando a execución de tarefas de mantemento en camiños locais, mellorando a mobilidade nas zonas rurais  entre as distintas localidades do municipio”, subliñou o mandatario provincial.