Dende este 1 de decembro os partidos que se disputen no Campo Municipal de Fútbol da Pinguela durante a tempada 2024-2025 poderanse seguir en directo grazas a un convenio de colaboración subscrito entre o Concello de Monforte e Televisión do Deporte Galego.

Trátase dunha plataforma de streaming exclusiva para o deporte modesto a través da cal se van a emitir os partidos dos principais deportes de Galicia a partir da tempada 2024-2025. Unha televisión por internet con App’s para todo tipo de dispositivos, incluídas Smart TV´s.

Segundo José Tomé, o Alcalde de Monforte, ”o obxectivo é axudar aos clubes modestos a xerar novos recursos económicos, así como dotalos de ferramentas tecnolóxicas para mellorar técnica e deportivamente. Neste caso, falamos do Club Lemos”.

Para a emisión dos partidos usarase un moderno sistema de produción composto por unha cámara panorámica de calidade 8k e unha cámara robotizada full HD manexadas mediante intelixencia artificial, así como unha mesa de produción na nube que permitirá engadir de xeito automático marcador, locucións, aliñacións, estatísticas do partido, e todo o necesario para facer unha realización de alta calidade.

CUSTE CERO PARA O CONCELLO

A empresa galega Cinfo, empresa encargada da emisión dos partidos, asinou un acordo coa Real Federación Galega de Fútbol que permite que tanto a instalación das cámaras como a emisión dos partidos non teña custe para o Concello de Monforte.

O Alcalde subliña o compromiso co deporte local e a aposta polas novas tecnoloxías con medidas como a devandita. E no caso concreto do Campo de Fútbol da Pinguela lembra outras axudas como a realizada para a renovación do céspede do terreo de xogo, para a iluminación do campo, para o novo videomarcador e a recente renovación dos parasois da grada do Campo de fútbol municipal de A Pinguela.

O enlace a través do que se poderá acceder á plataforma para seguir o partido do domingo entre o C.D. Lemos e o C.D. Lalín: https://tiivii.gal/videodetail/1178