Unha nova campaña do comercio local asociado de Chantada desenvolverase entre o 7 de decembro e o 2 de xaneiro. Segundo explican dende a entidade, “este ano, os Reis Magos levarán os agasallos á casa dos nenos e nenas do termo municipal de Chantada”, e engaden “para recibir a visita real é necesario gastar polo menos 100 euros nos establecementos asociados e levar os recibos ás oficinas da Asociación de Empresarios de Chantada (AECH) para anotarse na lista do percorrido das súas maxestades”.
Esta campaña, como explica o presidente da AECH e do CCA Ribeira Sacra, Iñaki Castiñeira, “quere, por unha banda, promover o comercio local e, por outro, facer felices aos máis pequenos da casa”.
DESENVOLVEMENTO DAS VISITAS DOS REIS MAGOS
A visita dos Reis Magos farase o día 5 de xaneiro e comezará ao remate da Cabalgata de Chantada, aproximadamente ás 20:30 horas. Cada Rei Meigo terá o seu percorrido, para poder chegar ao máximo número de casas posibles, tanto no centro urbano como nas parroquias.
Haberá prazas limitadas para esta acción, co cal adxudicaranse as visitas tras cumprir os requisitos de compras no comercio local e por estrita orde de reserva. Ao termo da campaña (o día 2 de xaneiro), deseñarase o percorrido e informarase a todas as familias da hora aproximada en que recibirán a visita das súas Maxestades de Oriente.
A campaña está cofinanciada pola Vicepresidencia Primeira e Consellería de Economía, Industria e Innovación da Xunta de Galicia, o Concello de Chantada, Clásicos do Asma e CCA Ribeira Sacra.
