O piloto monfortino Eduardo Iglesias será este ano o único piloto galego de motos que participe no Dakar 2025, a proba máis esixente ata a data, e que se celebrará entre o 3 e o 17 de xaneiro percorrendo 8.000 quilómetros de Arabia Saudita. Será a quinta ocasión na que Iglesias se enfronte á dureza do deserto árabe, proba que acabou en catro ocasións, xa que a quinta tivo que renunciar por un accidente na etapa prólogo.
Confirma o piloto que espera con ansia o inicio da proba un ano máis para poder mellorar os resultados das anteriores e que atoparon nunha posición 53 o seu mellor rexistro, precisamente no ano 2021. Eduardo Iglesias leva desde pequeno competindo en diferentes disciplinas de moto e chegar ao Dakar foi sempre o seu soño, un soño que lle trouxo, con todo, un accidente coas dúas clavículas rotas no 2023 e tamén a perda dun compañeiro e amigo nun accidente en 2024, “pero sempre volves, aínda que cando acabas dis que nunca máis, acabas repetindo cada ano”, asegura.
Para este piloto amateur, a meta está en acabar e se é posible mellorar os rexistros de anos anteriores para meterse no top 50. O mellor resultado obtido foi en 2021, a posición número 53 despois de competir con pilotos de todo o mundo, tanto profesionais como afeccionados. “Cada ano o Dakar é máis competitivo, o nivel dos pilotos é cada vez mellor e o proceso de selección é máis rigoroso, está máis caro mellorar”, explica. O piloto monfortino conta co patrocinio das tres administracións públicas principais, a Deputación, que achega 15.000 euros, o Concello de Monforte e tamén a Xunta, con Galicia Calidade.
Ademais, para reunir o orzamento necesario para esta proba conta tamén co apoio de numerosas empresas privadas, que levan con el nesta aventura desde o principio. Eduardo Iglesias presentou este venres en Lugo a moto coa que competirá na proba reina do motor xunto ao presidente da Deputación de Lugo e tamén alcalde de Monforte, José Tomé Roca, quen valorou a súa participación asegurando que “un lucense promocionando a provincia nun evento deportivo como o Dakar, que vai saír en televisións de todo o mundo, é moi importante”. Así mesmo, indicou que “hai que agradecerlle a Eduardo ese impulso que ten e o importantes que son este tipo de eventos para a promoción”.
