O Boletin Oficial da Provincia de Lugo vén de publicar a resolución definitiva das axudas de concorrencia competitiva —380.000 euros— para asociacións culturais da Vicepresidencia da Deputación de Lugo. A resolución confirma a listaxe provisional, publicada en novembro, e recolle a concesión de 431 subvencións  –256 para a organización de actividades e 175 para investimentos e equipamentos–, que benefician, fundamentalmente, a pequenos colectivos culturais.

Atendendo ás solicitudes presentadas, hai que diferenciar, por unha banda, as subvencións destinadas á realización de actividades de carácter cultural, recursos que se destinan a iniciativas de promoción e difusión do patrimonio material ou inmaterial, a celebracións populares como entroidos, magostos ou foliadas, a iniciativas de formación en música e baile tradicional, a obradoiros de teatro ou a edición de revistas. E por outra banda, na liña subvencionable investimentos en instalacións de carácter cultural e en equipamentos culturais, as achegas destínanse a financiar a compra de equipamento informático e musical, mobiliario ou  en actuacións de mantemento e mellora en locais sociais.

A deputada de Cultura Iria Castro destacou que “a listaxe de colectivos que reciben estas axudas é unha boa mostra da capacidade do asociacionismo para impulsar a creación e a programación cultural en todo o territorio” e avanzou que “os orzamentos de 2025 recollerán unha suba da partida destinada a estas convocatorias para ampliar a súa cobertura, e tratar de atender o incremento de solicitudes que se produciron esta anualidade, na que recibimos preto dun centenar máis que o ano pasado”.

As entidades beneficiarias teñen agora ata o vindeiro 31 de marzo para presentar a xustificación das subvencións. Os modelos a cumprimentar están dispoñibles na web cultura.deputacionlugo.gal