Esta campaña vai destinada a toda a veciñanza de Láncara e móstrase como tiro de saída dos cambios na recollida da fracción orgánica que se van implantar durante o 2025.
A campaña céntrase en 3 puntos distintos. Ás persoas residentes na Pobra de San Xiao déuselles información sobre a nova recollida mediante o novo contedor de cor marrón, ademais do reparto dun caldeiro para separar adecuadamente na cociña e bolsas compostables.
Por outro lado, a xestión dos residuos orgánicos na urbanización Valdriz vai ser mediante un Centro de Compostaxe Comunitario (CCC). Todos os veciños desta urbanización van recibir unha visita de persoal contratado polo concello para dar a información sobre esta forma de xestión.
Finalmente, a campaña vaise centrar nos Grandes Produtores de residuos orgánicos do municipio (bares, restaurantes, tendas de alimentación, escola, residencia…), onde se lles vai explicar detalladamente a nova proposta de recollida que vai ser implantada no Concello.
Esta campaña é o inicio dun acompañamento e información duradeira para todo este proceso de cambios na recollida do lixo, necesarios para poder cumprir cos obxectivos e lexislacións estatais e europeos.
