O Concello de Pantón remata o ano cunha bandeira colgada do balcón da Casa Consistorial na que piden paso peonil en Santo Estevo do Sil. A aldea quedou incomunicada despois das obras de mellora da vía entre Monforte de Lemos e Ourense e agora reclámanse solucións. Falamos con alcalde de Pantón, José Luis Álvarez.
Que destacaría deste 2024 no Concello de Pantón?
Todas as obras de mellora de servizos no rural e na capitalidade municipal, seguimos levando auga, saneamento e mellores estradas a distintos puntos do municipio, pero o comezo das obras da Residencia da Terceira Idade é algo polo que levamos tempo traballando e ver que se está materializando é unha boa noticia. Ou as Vivendas Sociais das que entregamos dúas e en xaneiro esperamos entregar o resto.
Outra das obras importantes deste ano é levar a auga a San Vicente de Castillón, San Estevo do Mato e Santiago de Castillón, invístense 600.000€ e están para rematar no 2025. Levamos tamén auga a Pereiro, Gallegos, Bazal, Segade, Cima de Atán,… Mellorouse a rede xeral de augas poñendo contadores para controlar as perdas e aforrar auga, renovamos o depósito da rede municipal en Guítara e fixemos colector en Vilamelle.
Residencia 3º idade / XdL
Neste ano melloráronse tamén distintas instalacións municipais.
Reparouse o tellado do Centro de Día e colocouse un porche para non mollarse ao baixar do coche, melloráronse os accesos e na Gardaría tamén cambiamos o solo. No complexo deportivo mellorouse o céspede e o alumeado e instalouse rego automático no campo de fútbol. Reformouse a piscina municipal con novo céspede, un novo tanque e un peche das instalacións. E acondicionouse o acceso ao Pavillón Municipal coa instalación dunha varanda.
Optimizouse a eficiencia enerxética e accesibilidade coa remodelación da iluminación nos edificios muncipais e o cambio de portas, ventás e tellados na Biblioteca Municipal, Asuntos Sociais ou os Xuzgados. Na Casa Consistorial habilitouse o acceso mediante ascensor.
Preguntoiro / JAF
“Temos unha situación envexable que nos achega turismo todo o ano”
No turismo e no patrimonio o 2024 deixa en Pantón a apertura dunha nova ruta e novas campañas de escavación no Preguntoiro
Este outono inauguramos a Ruta do Xanarteiro, unha ruta circular con saída e chegada a Ferreira. No Preguntoiro imos xa pola cuarta campaña de escavación, pero ademais temos pendente de inaugurar o novo miradoiro de Bazal. Completamos a mellora dos accesos á igrexa de Pombeiro, arreglouse o solo da igrexa das Bernardas e fixéronse obras de conservación no retablo da igrexa de Ribeiras do Miño.
En canto a visitantes quero destacar o éxito do Entroido de Pantón, ou do Enduro que no 2025 celebraremos no mes de marzo, seguimos traballando en cultura e na Oficina de Turismo batemos récord de visitantes. Temos unha situación envexable que nos achega turismo todo o ano co campo de golf, o balneario, as Bernardas, a fervenza de Augacaída e o noso turismo cultural.
Rota do Románico de Pantón / Concello de Pantón
“Economicamente non temos créditos nin pólizas”
A oposición ten criticado as contas do Concello, en que situación está administrativamente? Para cando os orzamentos do 2025?
Agora temos nova secretaria. Xa tivemos un pleno para as contas que demostraron que o Concello ten saúde. Co pleno do 20 pagáronse as facturas atrasadas que non estaban relacionadas co crédito da partida,… co novo equipo traballamos para pagar esas facturas. Economicamente non temos créditos nin pólizas. Temos facturas por pagar, pero moitas por cobrar, temos remanente no banco. Aínda están por cobrar o Plan Marco do ano pasado, parte do Plan Único, o obradoiro de emprego e moitas subvencións das que fixemos as obras e están sen cobrar.
Os orzamentos aprobaranse en xaneiro ou febreiro, este ano estamos para regular as contas e pagar todas as facturas e a partir do 31 de decembro comezaremos co orzamento do ano que vén.
Se houbera que poñer un pero ao 2024 en Pantón sería a situación de Santo Estevo do Sil?
Tivemos grandes problemas durante as obras de Adif coa estrada que vai de Ferreira a Santo Estevo que estivo intransitable. Estivemos sufrindo un ano as problemáticas das obras sen poder circular por esta estrada provincial e agora deixan á xente sen accesos.
“Teremos finalizada a Residencia e teremos un novo Centro Médico a 50 metros do actual”
Que espera o alcalde de Pantón do 2025 para o Concello? Que proxectos verán a luz?
Teremos finalizada a Residencia e teremos un novo Centro Médico a 50 metros do actual. Xa temos o solar para un novo centro médico con máis servizos, que podería estar rematado no ano que vén cun invesmento dun millón de euros.
Terminarase de levar auga aos núcleos que faltan co proxeto de Santo Estevo do Mato, Santiago e San Vicente de Castillón. Coa Xunta de Galicia finalizaremos o colector de Tuiriz, 1M€ coa CHMS para o colector de San Martiño de Pantón e o de Moreda que se non conseguimos subvención farase con fondos propios. Tamén coa CHMS hai convenio para melloras na depuradora de Ferreira e para facer a pasarela da Barca.
Seguiremos co programa de fontes, remataremos os accesos á Piscina Municipal coa dotación de aparcamentos e árbores. Seguiremos mantendo a rede de estradas na que este ano investimos 220.000€, e faremos a última fase da beirarrúa de Tuiriz. No 2025 queremos mellorar tamén a estrada principal de Ferreira.
O anuncio de Iberdrola de rehabilitar A Chaira parace un agasallo para o 2025?
Iberdrola xa está traballando no lugar da Chaira, fan un investimento de 4 millóns de euros para renovar as casas. Proximamente farase unha presentación, abríndose a opción a un complexo turístico ou espazo de vacacións para os empregados. Tamén Adega Os Castros prevé investir no municipio 5 millóns de euros.
