No conxunto da provincia contrátanse 45 Axentes de Desenvolvemento Local, 44 deles noutros tantos concellos e un máis na Deputación Provincial. O investimento global ascende a 424.000 euros.

A Xunta renova anualmente este programa para favorecer a súa continuidade, xa que estes profesionais contan coa formación e experiencia para servir de apoio ás iniciativas de creación de emprego e  constitución de pequenas e medianas empresas que poidan xurdir na contorna. Desde a Xunta considérase fundamental asesorar a emprendedores e/ou desempregados para contribuír a dinamizar a economía local.

“É fundamental que a información sobre os distintos programas e recursos que facilitan tanto a Xunta como outras administracións ou entidades chegue a todo o territorio, especialmente ás zonas rurais, onde é necesario impulsar proxectos económicos viables e atractivos para a xente moza”, afirma o delegado, José Manuel Balseiro.

Os Axentes de Desenvolvemento Local son os encargados do acompañamento técnico no inicio dos proxectos empresariais, asesorando e informando sobre a viabilidade técnica, económica e financeira e o apoio aos promotores das empresas. Esta actividade contribúe á constitución dun contorno local propicio á creación de emprego e a potenciar a xeración de iniciativas empresariais e novas actividades xeradoras de emprego.