O Concello de Monforte vén de informar dos “excelentes datos de afluencia de visitantes“ no pasado ano 2024 a raíz da información obtida nos diferentes espazos municipais dedicados á atención turística, como son a Oficina de Turismo e a Oficina de Atención ao Peregrino.
Segundo o Alcalde, José Tomé, “despois do boom turístico que se viviu no ano 2021, que provocou un repunte espectacular, nos anos 2022 a 2024, xa estabilizada a situación do turismo, as cifras do ano 2024 son as mellores dos últimos anos, sobre todo, en comparación cos anos anteriores á pandemia”.
A información anterior revela que Monforte é un dos destinos preferentes na Ribeira Sacra e que a tendencia cara a desestacionalización vai en aumento.
DATOS DAS OFICINAS TURÍSTICAS
A Oficina municipal de Turismo, alcanzou en 2024 as 19.458 persoas atendidas. Porcentualmente, foron un 5,77% máis de visitantes que en 2023 (1.063 persoas máis). Se acudimos a anos previos á pandemia, por exemplo en 2024 foron atendidas un 31,02% máis de persoas que en 2018 (+ 4.607 persoas).
A Oficina de Atención ao Peregrino de Monforte, tamén alcanza datos históricos con 3.676 persoas atendidas en 2024, e tendo en conta que está operativa dende setembro de 2021. Prodúcese un aumento destacado no ano 2024 con respecto ao 2023, pois foron atendidas 1.556 persoas máis, un 73,39% máis.
PROCEDENCIA DOS TURISTAS
Segundo trasladan dende o concello, e a partir tamén dos datos oficiais das oficinas devanditas, as principais zonas de procedencia dos turistas nacionais son Madrid, Cataluña, Pais Vasco e Andalucía, ademais de Galicia. E procedentes doutros países, Francia e Italia ocupan os primeiros postos, seguida de Alemaña, Reino Unido ou Holanda.
UNS DATOS PARA PRESUMIR
“Os resultados turísticos de 2024 son excelentes e confirman a recuperación e a solidez do sector” comentaba o rexedor monfortino, engadindo ademais que “os datos demostran que Monforte de Lemos e a Ribeira Sacra están ben promocionados polo Concello e por iso están de moda e constitúense hoxe coma un dos principais destinos turísticos do interior de Galicia, sobre todo grazas á promoción permanente e con eventos que realiza o Concello, tanto a nivel galego como estatal”.
Unha proba máis do crédito turístico co que conta Monforte foi tamén a recente obtención de 5 Q’s de Calidade Turística, outorgadas polo Instituto para la Calidad Turística Española (ICTE), ás dúas oficinas de información municipal, ademais da Torre da Homenaxe, o Miradoiro do Duque e o Centro de Interpretación do Viño da Ribeira Sacra.
