A pasada fin de semana celebrouse en terras pontevedresas, concretamente en Mondariz Balneario, a Copa Ibérica Slalom (1º competición), proba na que se disputaban a 1ª Copa Galega Novas Promesas Slalom e a 1ª Copa Galega de Slalom Olímpico.
O río Tea foi o escenario que reuniu, ademais de clubes galegos, outros procedentes de lugares como Portugal, Asturias, Euskadi, ou Salamanca. Houbo un gran número de deportistas que demostraron un alto nivel desafiando o complicado percorrido deseñado nas dúas xornadas para o descenso das augas bravas do río pontevedrés.
O club Quixós chegaba a Mondariz Balneario coas expectativas altas, aínda sabendo do complicado que sería alcanzar medallas. Tras unha primeira xornada clasificatoria –sábado 1 de febreiro– chegaba o domingo, día no que nunha soa manga se decidiu a clasificación final cun balance de 7 medallas invididuais e un terceiro posto por equipos para a expedición monfortina.
En relación ao resultado acadado cómpre salientar a achega das mulleres que, grazas ás súas 5 medallas individuais, impulsaron ao Quixós ata o terceiro posto.
MEDALLEIRO
O club gañador desta Copa Ibérica de Slalom foi o club anfitrión, o Tea Mondariz Balneario, quedando o Quixós como terceiro despois do equipo portugués do Aventura Marao Clube.
No que respecta a méritos individuais, volveron con medallas para Monforte: Sara Inés Varela, con 2 ouros en Cadete K-1 e C-1; Noa Díaz, con prata en C-1 senior e bronce en K-1 senior; Nerea Gutiérrez, prata en C-1 junior; Santi Díaz, prata en K-1 veterán; e Iván Gutiérrez, bronce en K-1 veterán.
