Francisco Alonso Tajes, podólogo, profesor e terapeuta da Universidade da Coruña, vén de impartir ao alumnado de 4º ESO, 1º BAC e ciclo de Calzado no IES A Pinguela unha interesante conferencia/taller sobre “Os Pés no deporte: visión científica dun podólogo namorado do deporte”. Tajes é profesor da Escola Universitaria da UDC onde, ademais da súa tarefa docente, fai traballos de investigación e tamén asistencial nas materias de Ortopedia, Terapéutica Farmacolóxica e Podoloxía Deportiva.

O relator convidado polo centro de ensino é tamén profesor en prácticas clínicas impartidas na Clínica Universitaria de Podoloxía de Ferrol, principalmente na atención a persoas con alteracións morfolóxicas e funcionais do pé asociadas á práctica deportiva, e tamén membro do grupo de investigación INCIDE (Investigación en Ciencias do Deporte).

PÉS SANS E RENDIMENTO NO DEPORTE

A conferencia levou a conclusións como que na maioría dos deportes os pés sans, ben preparados e “ben vestidos”, son unha parte importante do rendemento deportivo ou simplemente de poder gozar facendo deporte.

E tamén xurdiron preguntas… Que di a ciencia sobre a relación pé-deporte? Como elixir o calzado deportivo axeitado para cada deporte? É normal que doan os pés cando se fai exercicio ou despois de facelo? Existe unha relación entre os distintos tipos de pés (planos, cavos, pronados, supinados…) e as lesións sufridas ou o rendemento físico? Estas e outras cuestións sobre a relación entre os nosos pés e a práctica deportiva foron contestadas nesta charla-obradoiro enfocada a descubrir conceptos básicos sobre a anatomía e a biomecánica dos pés e a súa relación co rendemento ou as lesións no deporte. O obradoiro incluíu unha análise morfolóxica do pé mediante unha plataforma de presión.