A Xunta de Galicia vén de lanzar unha nova páxina web, ribeirasacrapaisaxedaauga.gal con toda a información sobre a candidatura da Ribeira Sacra a Patrimonio Mundial. Deste xeito, a Consellería de Cultura, Lingua e Xuventude pon a disposición da cidadanía a documentación relativa ao traballo de técnicos, expertos, veciños e axentes sociais que participaron na elaboración da proposta Ribeira Sacra: Paisaxe da auga.
A web ofrece tamén a posibilidade de descargar o expediente completo que foi remitido para a súa avaliación ao Centro de Patrimonio Mundial de París e no que se inclúe o decreto de declaración como Ben de Interese Cultural desta paisaxe ou a información relativo aos encontros internacionais celebrados nos anos 2023 e 2024.
Cómpre lembrar, que o pasado mes de xaneiro, cumprindo rigorosamente cos trámites e termos esixidos, o Goberno galego remitiu ao Ministerio de Cultura o expediente que, tras unha primeira revisión, foi enviado a París. Con esta entrega iníciase o proceso de avaliación da candidatura a Patrimonio Mundial pola Unesco, cuxo resultado coñecerase ao abeiro do Comité Internacional do Patrimonio Mundial que se celebrará o vindeiro ano 2026.
