A conferencia levou por título “O impulso do rural en Lugo, unha oportunidade para o crecemento económico de Galicia” e nela Francisco Conde empezou lembrando a Galicia do 1958, cando naceu, cunha sociedade pobre e emigrante. Agora ben, resaltou a evolución, o cambio que se produciu no eido económico desde aqueles tempos ata a actualidade coa transición a unha sociedade industrial e con xente moi formada, líder no eido forestal e na industria agroalimentaria entre outras.
Puxo exemplos de empresas punteiras que na actualidade medran, dan emprego e exportan desde Galicia pero tamén sinalou os problemas do rural do século XXI, problemas que ao seu entender non hai que localizar só no rural galego senón tamén no rural español e europeo. Esas eivas económicas, segundo refería, pasan pola escasa creación de emprego, as dificultades coas que se atopan os empresarios que queren investir nos nosos concellos e a crise demográfica.
Para axudar aos emprendedores considerou que hai que reducirlle impostos, burocracia e acceso ao solo empresarial para favorecer a necesaria creación de emprego. Valorou especialmente a necesidade de estabilidade política para que esas condicións se podan dar e que exista confianza dos emprendedores no futuro. En consonancia co anterior indicou ademais que cómpre favorecer ás persoas con talento e dar soporte con boas infraestruturas e conexión veloz a internet.
Sobre o reto demográfico sinalou a escasa natalidade coma un dos maiores problemas de concellos de Lugo como O Saviñao, con só un 7% de menores de 15 anos e máis da metade da poboación que supera os 65.
En clave optimista e mirando cara o futuro, resaltou que a tecnoloxía actualmente permite desenvolver proxectos innovadores e profesións con futuro. Os cambios no eido económico están sendo drásticos e moi rápidos polo que se considera que 8 de cada 10 menores de 20 anos acabarán traballando en profesións que aínda non existen. Conde recoñecía esta situación e facía unha chamada cara a esperanza no futuro dicindo que o que vemos como unha ameaza tamén pode ser unha oportunidade.
