O Centro Comercial Urbano (CCU) de Monforte busca aumentar o número de asociados/as para seguir potenciando o comercio local. Con este obxectivo impulsa unha campaña na que ofrece un 50% de desconto na primeira cota semestral para os negocios que se asocien antes do 22 de febreiro.
A entidade lembra, entre outras, algunhas vantaxes por formar parte do CCU: maior visibilidade ao participar en promocións e campañas colectivas, máis clientes e consumidores que chegan grazas ás actividades dinamizadoras que se realizan durante o ano e máis forza para negociar coas administracións á hora de obter subvencións. Ademais, os asociados e asociadas benefícianse cada ano de recibir información de moito interese, como por exemplo, as convocatorias de subvencións, de obter descontos en contratos publicitarios cos medios locais e tamén en ter acceso de balde a formacións teóricas e prácticas.
A campaña xa está a dar resultados, comentan dende a xerencia, pois xa se deron de alta oito novos negocios: Librería Pelayo, Dinámica Monforte, Kyri Mascotas, Papelería Cruceiriño, Chuladas y Más, Brenda Shop, Torres Mobiliario e Sim-Sistemas Informáticos Maykell. Ademais, hai tres empresas máis que teñen interese e están a piques de formalizar a súa adhesión.
Nos últimos anos, malia as dificultades que enfronta o sector comercial, o número de establecementos asociados mantívose arredor das 150 empresas, o que consolida ao CCU de Monforte como o maior colectivo empresarial da Ribeira Sacra na actualidade, e tendo en conta que o seu ámbito de actuación limítase exclusivamente ao núcleo urbano de Monforte. A asociación segue sendo unha das principais ferramentas de dinamización económica e social da comarca, promovendo iniciativas que fortalecen o comercio local e xeran un impacto positivo no tecido empresarial da zona.
Para rematar, dende a xerencia lembran tamén que “o CCU Monforte continúa traballando activamente na representación, promoción e defensa dos intereses do comercio local, impulsando campañas e eventos que fomentan o consumo nos establecementos de proximidade”.
PARA CONTACTAR
Os negocios interesados en formar parte do CCU Monforte poden contactar coa asociación a través do teléfono: 982 404 767, do formulario de contacto da web www.ccumonforte.com, ou das Redes sociais: @ccumonforte
