O Club Taekwondo Neka abandeira o deporte monfortino polo mundo adiante e demostra ano tras ano que os resultados avalan o seu traballo. Por todo isto, Tomé Roca quixo agradecer o labor de clube ao seu Presidente José María Vega e recibir como se merecen aos deportistas que acadaron importantes resultados en competicións de taekwondo a nivel nacional, europeo e mundial.

Os mozos/as homenaxeados foron:

Laura Álvarez Suárez e Daniel Arean Grejs en recoñecemento pola participación e os resultados conseguidos no Campionato de España de Taekwondo por Clubes, en categoría cadete, na modalidade de técnica parellas, celebrado en Marina d´Or entre o 8 e o 9 de decembro. Conseguiron a medalla de ouro na clasificación final do campionato.

Junior Martínez Castillo en recoñecemento pola participación e os resultados conseguidos no Campionato de Europa de Taekwondo por Clubes, en categoría absoluta, modalidade de combate, celebrado en Marina d´Or entre o 5 e o 7 de decembro. Conseguiu a medalla de bronce na clasificación final do campionato.

Alejandro Losada Rodríguez e Elena Varela de Fátima en recoñecemento pola participación e os resultados conseguidos no Campionato do Mundo de Taekwondo na modalidade de técnica parellas, en categoría absoluta, celebrado en Taipéi entre o 15 e o 18 de novembro. Conseguiron a décimo segunda praza na clasificación final do mundial.

Nesta recepción, no Salón de Plenos do concello, o Alcalde entregoulles a cada un dos homenaxeados/as unha reprodución en miniatura da Torre da Homenaxe. Ademais de recoñecer os resultados deportivos froito do seu traballo e constancia, animounos a seguir adestrando para acadar novos éxitos e no futuro poder estar nalgunha olimpíada; feito este que sería un gran acontecemento para eles, para o Clube, para o concello e para os monfortinos/as.