O IES A Pinguela foi seleccionado polo Ministerio de Educación para participar nun proxecto sobre “Diversidad medioambiental como herramienta educativa para el fomento de la educación ecosostenible”. Grazas a esta iniciativa, a pasada semana puideron visitar Melilla coñecendo unha cidade multicultural que fai fronteira con Marrocos e onde conviven musulmáns, cristiáns, xudeus e hindús.
Foron recibidos no Palacio de la Asamblea, sede da Cidade Autónoma, onde tiveron a recepción polo presidente da Cidade, Juan José Imbroda –o que fora adestrador de basket– e coincidiron con Luis de la Fuente –seleccionador nacional de fútbol–. Alí puideron sacar fotos cos últimos títulos da selección de fútbol.
O alumnado de 3º da ESO fixo tamén un recorrido pola Melilla Sefardí onde visitaron o Museo de Historia, Arqueoloxía e Etnografía da cidade e o Fuerte Victoria Grande. Así mesmo realizaron unha ruta guiada por Melilla la Vieja –un baluarte rodeado de auga excepto pola parte que a une ao continente e gracias ao que Melilla resistiu centos de asedios e clave para entender a historia da cidade– onde viron os antigos Alxibes, as covas refuxio do Conventico, as covas escondidas, as celas antigas…
Dende o punto de vista medioambiental visitaron a incineradora, onde se tratan os residuos sólidos urbanos e recuperan enerxía durante o proceso, e a depuradora de augas residuais. Finalmente, e para ter algo de lecer, realizaron actividades de kaiak e vela no Club Marítimo.
No IES Leopoldo Queipo, centro anfitrión, participaron nunha xornada de convivencia onde o mago Serapín ofreceulles un entretido showe e o alumnado da ESO local deulles a coñecer os costumes familiares das súas distintas comunidades, gastronomía, relixión, arte e baile.
Como remate á semana cultural de intercambio realizaron unha visita ao Acuartelamento do Tercio “Gran Capitán” 1º da Lexión.
