Aqueles veciños e aquelas veciñas que desenvolvan algunha actividade cultural a través das súas asociacións culturais na provincia de Lugo poden optar un ano máis a interesantes axudas da Vicepresidencia da Deputación de Lugo. Subvencións que este ano contan cun investimento total de 500.000 euros, 120.000 euros máis que na última anualidade.
A convocatoria inclúe dúas liñas de axuda: unha para a realización de actividades culturais, dotada con 315.000 euros, e outra para melloras nas instalacións e no equipamento de locais, cun importe de 185.000 euros.
A deputada Iria Castro explicou que “seguimos reforzando esta liña de axudas para atender o crecente dinamismo das asociacións, unha rede fundamental para facilitar o acceso á actividade cultural e crear espazos de socialización e convivencia arredor da cultura e do patrimonio, especialmente nas parroquias e concellos máis pequenos”.
SUBVENCIÓNS PARA ACTIVIDADES CULTURAIS
A través desta liña, a área de Cultura colabora no cofinanzamento de gastos que supón a organización de actividades e eventos culturais por parte das asociacións lucenses, especialmente aquelas orientadas á difusión do patrimonio material e inmaterial de Galiza, da historia, da música, da lingua e das tradicións. As axudas van dos 500 aos 3.000 euros.
SUBVENCIÓNS PARA MELLORA DE LOCAIS SOCIAIS
A área de Cultura financia, a través desta liña, actuacións de mellora, acondicionamento e reforma de locais e instalacións culturais que os colectivos cultivos culturais teñan en propiedade, cedidas ou alugadas. Tamén se subvenciona a compra de equipamento, facilitando así que as asociacións conten cos medios axeitados para a realización das súas actividades culturais. As axudas oscilan entre os 500 e os 2.000 euros.
TRÁMITE DAS SOLICITUDES
As bases e modelos de solicitude publicáronse o pasado venres 7 de marzo no Boletín Oficial da Provincia, e na web da deputación están dispoñibles as indicacións e os modelos de formularios que cómpre encher e presentar xunto coa solicitude. O prazo estará aberto ata o venres 21 de marzo, incluído.
Na última convocatoria, o pasado 2024, concedéronse un total de 431 subvencións, 256 para a organización de actividades culturais e 175 para investimentos e equipamentos.
