O III Congreso Internacional da Auga trouxo á Ribeira Sacra, neste 2018, a conferenciantes vidos de diferentes países, que puideron coñecer de primeira man a viticultura heroica e a riqueza patrimonial do románico neste territorio. Tamén se recibiu a visita dun importante grupo de sumilleres, responsables de restaurantes en Nova York e Nova Jersey e dun grupo de importadores rusos. O interese polos viños desta Denominación tamén trouxo á Ribeira Sacra aos xornalistas que participaron na International Galician Wine Week e durante a vendima, a axencia Efe realizou unha reportaxe que ten como destino o público anglosaxón. Outro feito imporante foi que Barak Obama pediu brindar cun Mencía da Ribeira Sacra no Cumio da Economía Circular celebrado en Madrid en xullo, despois de facelo durante 3 anos, sendo presidente, na cena de gala que presidía no “Congressional Hispanic Caucus” en Washington.

Neste ano, a colleita do 2017 recibía a cualificación de excelente na Cata de Calificación dos viños da Ribeira Sacra, algo que non acontecía desde o 2000. Con esta cualificación daba comezo un ano cheo de premios e recoñecementos, entre outros, nos seguintes  certames:

• Premios Bacchus 2018
• Concurso nacional de Pequenas D.O.
• Concurso Catavinum WordWine & Spirits Competition 2018
• 7 medallas na I Edición do Concurso de Viños Vinespaña 2018.
• 13 medallas no 26 Concurso Internacional “Mondial des Vins Extremes”.
• Na “XXIV Cata dos Viños da Ribeira Sacra”, o panel de cata destacou a calidade dos viños e os resultados acadados cos viños envellecidos.
• 3 premios aa XXX Cata dos Viños de Galicia
• Na Guía Peñín, a Ribeira Sacra foi a mellor puntuada de Galicia e cuarta de España, cunha media de 89,89 puntos.
• 2 medallas no maior certame internacional de viños de España e Portugal, “VinDuero-VinDouro”.
• Vencedora no concurso “Distinciones Gallaecia” na categoría de viños.
• 20 adegas recibiron premios da Revista HG&T á calidade dos seus viños.

O 2018 foi tamén un ano de boa vendima, con algo máis de 6 millóns de quilos de uva de moi boa calidade recollidos. A vendima na Ribeira Sacra estase convertindo tamén nun importante motor económico, xerando este ano, preto de 3.000 empregos directos, que supuxeron case 3 millóns de euros en salarios. A Denominación tamén aprobaba en outubro a ampliación das variedades autorizadas, a posibilidade de producir viños rosados e incorporaba novos territorios.

A promoción segue a ser un dos pilares desta Denominación e non faltou a Enofusión, Fitur, Xantar, Prowein, Alimentaria, Intervin, Gourmets, Galicia 31: experiencias de calidade, o II Día Movemento Viño D.O.,…ademais de volver a ser etapa de La Vuelta Ciclista a España. O 2018 foi o ano de consolidación do II Festival do Viño da Ribeira Sacra e o ano no que realizou a itinerancia por Galicia da exposición, 25 anos de Ribeira Sacra. A Denominación colaborou co “Estase cocendo”, “Cume Tapas de Monforte”, “Cociña con castaña de Galicia”, “Mira quien cocina especial Barbacoa” de Ternera Gallega ou os concursos de tapas “Picadillo” e “Concurso Tapas Lugo 2018”.

De cara o futuro a Denominación segue apostando polo enoturismo, a través da Ruta do Viño da Ribeira Sacra e convencida de que a vitivinicultura é o principal motor económico deste territorio, polo que produce e factura, pero sobor de todo, pola capacidade que ten de estimular o desenvolvemento doutras actividades. A declaración da paisaxe cultural da Ribeira Sacra como Ben de Interese Cultural como paso previo a optar a ser Patrimonio Mundial da Unesco é a mellor das noticias para pechar este 2018 e afrontar o 2019 con ilusións renovadas por todo o territorio da Ribeira Sacra.