O grupo municipal xa presentara outras mocións ao respecto na lexislatura pasada, pero a situación asistencial da veciñanza chantadesa, tanto no Hospital Comarcal de Monforte como no Centro de Saúde da Chantada “segue sendo insuficiente e viuse degradada nas últimas semanas, como temos advertido no tocante ao centro de saúde”, aseguran.

No Centro de Saúde afirman que “non contan co suficiente persoal (semanas con só dúas persoas facultativas máis outra para peonadas) enfrontádonse con listaxes de agarda para probas ordinarias que poden chegar a pasar do ano e medio e con tempos intolerábeis en probas diagnósticas urxentes, como no caso de tumores; é das poucas comarcas que non conta coa Hospitalización no fogar (HADO) atinxindo dun modo directo a doentes crónicos que pola súa condición sofren a penosidade da carencia diste servizo; falta unha segunda equipa no PAC; e cóbrense permisos, licenzas ou feiras saturando o resto de persoal.”

A isto engaden a situación de falta de especialistas do Hospital de Monforte, “recórrese a peonadas e atenciós intermitentes que devalúan a atención e eternizan as listaxes de agarda; non existen urxencias pediátricas e a saúde mental nen está nen se agarda”.

Lembran que a Valedora do Pobo instou a Xunta a «avanzar na toma de medidas para cumprir o ditame”. Solicitan coa moción “obrigar á Xunta da Galiza a reparar todas estas eivas, xa que o que está en xogo é a saúde das persoas”.