A plataforma non descarta retomar as mobilizacións, así como volver á Valedora do Pobo e seguir traballando para que se cubran as baixas no centro de saúde, “se dote a Chantada dun segundo equipo no PAC ou se comece a ter HADO na nosa comarca, que está discriminada ao non contar cun servizo que si teñen a maioría de comarcas”.

Tamén anuncian que estudarán tender pontes con outros colectivos e plataformas para loitar por un hospital comarcal dotado de especialistas, “pois non podemos ser os pacientes e administrados os que paguemos as consecuencias da deficiente xestión da Xunta en materia sanitaria”.

Lembran que ademais das mobilizacións que impulsaron no seu día, comezaron tamén a incoación dun expediente diante da Valedoría do Pobo, “xa que unha poboación de máis de 8000 habitantes, non pode sufrir unha sanidade de inferior categoría a outros territorios”. Daquela, a Valedora indicoulle á Xunta que «sería preciso avanzar na procura de mecanismos que permitan solucionar a cobertura das prazas vacantes e ausencias
xustificadas en atención primaria no ámbito rural», e lamentan continuar coa mesma problemática no centro de saúde de Chantada sen cubrir as baixas de medicina e
enfermaría.

Chantada quere Sanidade anuncia, nesta situación, que seguirá loitando para cubrir as baixas do centro de saúde de Chantada, “e para ter un segundo equipo no PAC e para conseguirmos o servizo de hospitalización no fogar (HADO) que permite mellorar moito a calidade de vida dalgúns pacientes e familias”.