Entre o 4 e o 14 de abril desenvolverase a décimo terceira edición do Val de Quiroga de Tapas. O funcionamento do concurso será o mesmo que en anos anteriores. A tapa que cada establecemento presenta a concurso, a un prezo de 2 €, deberá estar a disposición do público consumidor entre as 12:00 e as 14:30 e as 19:00 e as 22:30. Cando o cliente complete a degustación de todas as tapas participantes poderá votar a súa favorita utilizando o mesmo tapacartón poñendo o nome da que elixe como gañadora e os datos da persoa participante e introducindo o mesmo nas urnas oficiais do concurso. Os concursantes terán de prazo ata o último día do concurso, o día 14, ás 23:00 h para depositar os cartóns con todos os selos en calquera das urnas situadas en cada establecemento participante.
O establecemento gañador recibirá unha placa conmemorativa e 100€ en metálico. Ademais os participantes que completen a degustación das tapas e voten á tapa que máis lles gustou entrarán nun sorteo no que poden gañar diferentes premios. 200€ e 100€ en metálico; unha ruta en Segway para dúas persoas atas os miradoiros de Pena do Castelo e Soutochao con Enoturismo Galicia; menús para dous en Abadía san Simón (ovos rotos con bogavante), en Torre Vilariño ou en La Fábrica (menú pechado); un paseo a cabalo para unha persoa en Hípica Os Trancos; ceas ou comidas para dúas persoas en Chapakuña 3, Ruxe-Ruxe, Praia Fluvial, A Botica ou o Portón; unha estancia para dúas persoas con almorzo no Hotel- Restaurante Las Vegas; cea, aloxamento e almorzo para dúas persoas na Ferrería Quintá; dúas botellas de viño da adega Val do Frade de Vilachá ou cestas con produtos típicos da zona: Aceiroga, Atrium Vitis, Casa de Outeiro, Caurelor, EDV 2015, Val de Quiroga e Lar de Ricobao.
