O Club Quixós de piragüismo vén de participar en varias competicións esta pasada fin de semana no Barco de Valdeorras. Concretamente, o sábado 5 de abril na modalidade de Sprint –individual e patrullas– da 2ª Copa de España de Augas Bravas; e o domingo 6 de abril na modalidade de Clásica. Así mesmo, eses dous días competían no Campionato Galego nas modalidades devanditas.
O balance final na clasificación por equipos foi espectacular para o club monfortino pois remataron como campións galegos, campións da Copa de España e terceiros no Campionato de España de patrullas. Acadaron 1571 puntos, quedando por enriba do equipo anfitrión, o Club Fluvial O Barco, con 1169, e xa como terceiro o Sicoris Club, de Lleida, con 1154.
No que respecta ao medalleiro individual, todas e todos os participantes do Quixós trouxeron metais para a casa. Na páxina de Facebook do club detallan as medallas acadadas piragüista por piragüista.
