Durante estas semanas o CEIP de Quiroga, a través dos diferentes proxectos cos que traballa como o Documental Integrado “Territorio Artesán”, organizará obradoiros de música tradicional e movemento a cargo de Outonía Cooperativa, obradoiros de creación de instrumentos artesanais coa Fundación Legar, asistirá ao teatro coa obra ‘Catro Monos’ (en colaboración co Concello de Quiroga), gozará dun concerto a cargo do grupo ‘Migallas’ e recibirá a visita dunha das súas autoras de referencia, Celia Díaz Núñez, que presentará á cativada o seu novo libro “A avoa canta coma a cotovía”.
“Queremos que este mes sexa unha celebración continua, pero tamén fomentar o uso da nosa lingua entre toda a comunidade educativa, coma o resto do curso pero con accións máis enfocadas a que o alumnado sexa un axente importante neste cambio”, comentan dende o centro de ensino quirogués.
Ademais, durante este mes de maio os préstamos na Biblioteca serán só en galego e comezouse coa iniciativa “Patios en galego”, co obxectivo de aumentar a curiosidade e a motivación polo seu uso. “Somos un centro rural pero no que o galego apenas se escoita no patio”, din.
O lema “Eu falo, eu sinto en galego” xa acompaña a todos os nenos e nenas do centro nunhas chapas que repartiron para inaugurar o “Galemés”, unha iniciativa á que se está a unir a Mesa pola Normalización Lingüística mandando material para o fomento do uso da lingua galega.
Ceip Quiroga / Concello de Quiroga
