Este sábado 31 de maio de 2025 terá lugar na Lóuzara Xabreira de Fiz Vergara Vilariño un roteiro moi especial pois servirá para gozar dun percorrido que foi mellorado e no que se fixeron restauracións moi importantes dalgunhas das intervencións artísticas.
Falamos con Xerardo Alvaredo, membro da directiva da A.C. Ergueitas, quen nos conta que o roteiro de Fiz Vergara Vilariño leva moitos anos facéndose, se ben a partir do 2010 pasou a ser “Roteiro Artístico Literario” grazas á incorporación de obras artísticas, escultóricas e literarias. Un percorrido que se fai cada ano e só se viu interrompido durante 2 anos na pandemia.
“Despois vimos que estaba estragado algún elemento do roteiro, e con deterioro no camiño e nalgunhas esculturas”, comenta Xerardo. Foi a partir de aquí cando o Concello de Samos se puxo mans á obra e cun plan de recuperación-restauración pediu unha subvención para poder acometer unha recuperación integral no ano 2024.
No que respecta á restauración e recuperación de intervencións artísticas, por exemplo, recuperouse integramente a peza de Manuel Buciños; reparouse a de Mónica Alonso; recuperouse do río e recolocouse a de Álvaro de la Vega; a intervención de Paco Poy fíxose en aceiro pois a peza de madeira estaba moi deteriorada; tamén se recuperou integramente a de Alfredo Yáñez e a de Violeta Bernardo parcialmente.
Ademais, segundo sabemos por Xerardo, arranxouse o camiño, repuxéronse os soportes dos poemas que acompañan as intervencións con material máis resistente, colocáronse sinalizacións e códigos QR para orientar as visitas, e puxéronse indicadores en Santalla.
“Neste 2025 no que o premio de poesía cumpre a súa 25 edición revitalizamos o roteiro que nos mergulla no territorio no que Fiz viviu e creou a súa poesía”, afirman dende a A.C. Ergueitas.
De cara ao roteiro do sábado 31 sairá ás 11:00 h. de Airapadrón, estará guiado por María Casar (Presidenta da A.C. Ergueitas), e farase co acompañamento de varias dos e das artistas plásticos/as que realizaron intervencións en 13 puntos interpretando outros tantos poemas do Fiz.
Para máis información e para reservar quen queira quedar a xantar, a organización ofrece o teléfono 677429225.
O ROTEIRO
Roteiro lineal que implica facer unha parte en coche e outra a pé. Foi creado por iniciativa da “Asociación de Escritores en Lingua Galega” e a “Agrupación Cultural Ergueitas de Sarria” en homenaxe ao poeta Fiz Vergara Vilariño, intelectual que viviu en Santalla de Lóuzara (Samos), contorna á que lle dedicou parte importante da súa obra.
Ao longo deste roteiro pódense ver diferentes esculturas xunto con poemas deste ilustre samoense, chegando a haber un total de ata 13 esculturas que lembran algún poema ou aspecto da vida do poeta, dos artistas plásticos Jesús Otero-Yglesias, Manuel Buciños, Primitivo Lareu, Álvaro de la Vega, Miguel Ángel Macía, Violeta Bernardo, Mónica Alonso, Paco Poy, Fernando Yáñez, Caxigueiro, Manolo Caamaño, Eduardo Valiña e Paco.
O roteiro comeza en Airapadrón e finaliza un pouco máis aló da Fervenza de Augadalte, en Santalla de Abaixo, sendo este último tramo, entre Santalla e a fervenza o que hai que realizar a pé (1 quilómetro aproximadamente).
