Dinamarca acollerá este 11 de xuño o ‘Salón dos Viños e Augardentes de Galicia’, un evento organizado por ACRUAGA (Asociación de Consellos Reguladores Vitivinícolas Galegos e das Indicacións Xeográficas de Augardentes e Licores Tradicionais de Galicia), coa colaboración da Unión Española de Catadores.
O encontro está dirixido a un público profesional do sector e busca dar a coñecer a calidade e diversidade das elaboracións vitivinícolas galegas, así como das augardentes e licores tradicionais, a través dunha mostra representativa das diferentes denominacións de orixe galegas.
Nesta ocasión, a Denominación de Orixe Ribeira Sacra participará cunha ampla representación: 22 viños de 12 adegas, entre os que se atopan 6 viños brancos e 16 tintos, tanto viños novos como crianzas en barrica e viños de garda.
TRABALLO PROMOCIONAL DE ACRUAGA
O ‘Salón dos Viños e Augardentes de Galicia’ forma parte das accións de promoción exterior que ACRUAGA desenvolve con regularidade en diferentes puntos da xeografía euroea. En anos anteriores, o evento celebrouse en Londres (2024) e Ámsterdam (2022).
A maiores, ACRUAGA promove accións formativas e encontros con profesionais do sector, como foi a visita do Master of Wine Pedro Ballesteros en xaneiro deste ano.
